Гадагш дэлгэрүүлэгч
Хорол эрдэнийн шинжтэй
Тооно түүнийг мялаая.
Далай цагаан дээвэртэй
Даргар цагаан туургатай
Хошлон хялгасан бүслүүртэй
Тагнай ширээстэй үүдтэй
Угалзан ширээстэй өрхтэй
Цөм бүрэн түүнийг мялаая.
Ороо морины дэлээр
Ороон томж хийсэн
Орсон буурын зогдроор
Оёж ширж хийсэн
Огторгуйн салхитай
Тэмцэлдэн байдаг
Оосор бүч түүнийг мялаая.
Өргөн үүдийг нь өргөж ороод
Өндөр босгыг нь алхаж ороод
Баруун авдрыг нь нээж үзвэл
Барын арьс
Баавгай, чоно
Үнэг, булга
Хярс, мануул
Хүдрийн арьс хүртэл
Цөм бүрэн түүнийг мялаая.
Зүүн авдрыг
Нээж үзвэл
Зүйл бүрийн эрдэнэ
Зүсмэл торго
Шахмал цай
Нэхмэл бараа хүртэл
Цөм бүрэн түүнийг мялаая.
Хойд авдрыг
Нээж үзвэл
Хуйгаар торго
Хунзаар цай
Хулсан лимбэ
Хуур ятга
Бийр янтай
Бичиг данс
Шагай шатар
Шагайн сум
Эрийн зодог
Эвийн цавуу
Хурдан морины хусуур
Хур сүүлийн боолт хүртэл
Цөм бүрэн түүнийг мялаая.
Тангуд цэмбэн эмжээртэй
Таван давхар гудастай
Таж магнаг хөнжилтэй
Тавсаг сайн ор түүнийг мялаая.
Түүний доод авдрыг
Нээж үзвэл
Нүүрийн толь
Нүдний шил
Шүдний сойз
Шүүр сам
Оо саван хүртэл
Цөм бүрэн түүнийг мялаая.
Орын дээд талын хайрцаг дээр
Оёх утас
Огтлох хайч