Олон зүйлийн юм
Цөм бүрэн түүнийг мялаая.
Хар хилэн хөвөөтэй
Хамба торгон хөшигтэй
Ханан хээ ширээстэй
Талын таван тойруулгатай
Цөм бүрэн түүнийг мялаая.
Төрийн дөрвөн тотготой
Төмөр дөрвөн шийртэй
Ган хуяг цагаригтай
Галын тулга түүнийг мялаая.
Балбын дархан балбаж хийсэн
Хачийн дархан хадаж хийсэн
Хайч түүнийг мялаая.
Оросын дархан овыг нь олсон
Монголын дархан модыг нь олсон
Төмрийн дархан түгжээг нь тохируулсан
Дөрвөн хөлтэй ширээ шиг
Дөрвөлжин зоотой морь шиг
Ширээ бөхтэй тэмээ шиг
Гайхамшигт бандан эргүүлэг
Түүнийг мялаая.
Гар данх
Галын шилээвэр
Хуу, домбо, хувин, гөнжөө
Хоолны төмпөн
Шүтээний таваг
Хүртэл цөм бүрэн түүнийг мялаая.
Ургаа модыг унагаж хийсэн
Уран дархан ухаж хийсэн
Уур түүнийг мялаая
Ган болдоор ирийг хийсэн
Гацуур модоор ишийг хийсэн
Сүх түүнийг мялаая.
Амьтан бүгдийг ундалж өгдөг
Амттан бүгдийг дотроо агуулдаг
Аяга шаазан түүнийг мялаая.
Туулын бургасыг тулгаж матсан
Тугал бярууны ширээр үдсэн
Арын модыг авчирч хийсэн
Атны зоогоор үдсэн
Араг шээзгий түүнийг мялаая.
Сайн модыг цавчиж хийсэн
Салаа модыг ашиглаж хийсэн
Сарлаг үхрийн ширээр үдсэн
Савар түүнийг мялаая
Энэ айл минь
Олон малаа гаднаа хураагаад
Оюутан бүгдийг гэртээ дүүргээд
Өвч хивс дэвсгэртэй
Өнгийн идээ жимс өрөөстэй
Өдөр шөнөгүй найртай
Өөдөө өнгөрсөн бүгдийг
Хооллож байдаг.
Уруугаа өнгөрсөн бүгдийг
Ундалж байдаг