Галын тахилга

Рам үсгээс үүдсэн

Аршсын увдисаар бүтсэн

Ариун гэгээн чанарт

Хатууг түлэгч

Харанхуйг гийгүүлэгч

Хайр чулуун эхт

Хатан төмөр эцэгт

Хий салхин хөгжлөгт

Хөвөн уул ноцолгот

Галын хан Миранз, энэ өдөр

Үндсийг чинь дуудаж

Үлгэрийг чинь дурдахуй шалтгаан

юувай гэхүл

Сод богдын сургууль

Сутай хатны үлгэр бөлгөө.

Цөл болсон орчлонд

Зөв буянаар учирсан

Шил сайт хөвгүүн

Шивэргэл сайт бэр

Хоёрыг чинь буулгаж

Өмчит улсаа хурааж

Өнгөт манлаг өмсгөн

Өөхөн тосоор тахинам

Өргөжих их төрийн эзэн

Хаан хатан болон ийн жарган заяан атугай.

Сав ертөнц бүтэхүйгээс

Шим олон амьтныг үүдэхүйгээс үүдсэн

Сод хаан эзний цахисан

Сутай хатан эхийн үлээсэн

Сүлдэсүн Торгон шарын хадгалсан

Улаан хялаалз амьт

Үүл нэвт униарт

Этүгэн эх нэвт илчит

Торгон нүүрт

Тосон амьт

От галахан эхэд

Тосон өөхөн дарс

Дусаан тахинам.

Өөдлөх их төрийн эзэн

Хаан хатан болон ийн жарган заяан атугай.

Албат улсаа хурааж

Алтат манлагаа өмсөн

Ариун тосон дарснаар тахинам.

Амин насан урт болоод

Арвитах энх их төрийн эзэн

Хаан хатан болон

Ийн жарган заяан атугай.

Чакраварди цэцэн хаан

Цамбуй гоо хатан хоёрын

Заяасан зам

Сургасан үлгэр бөлгөө.

Харьтнаас авчирсан боол болон

Хамаг их улсаа хурааж

Халиут манлаг өмсгөн

Хамаг улсын эзэн

Хаан хатан болоод

Ариун буяныг үйлдэж

Ариун буяныг үйлдэж

Албат улсаа асран тэтгэж

Арван орны бодисадвагийн явдлаар явж

Ашид Аминдаваа бурханы хутгийг олон

Ийн жарган заяан атугай.

Хаан эцэг чинь ерөөл ерөөнөм.

Хасбуу тамгаа барин жаргаж

Хамаг улсаа эзлэн жаргаж

Хан нэрийг үл алдах болтугай.

Буянт үйлсээр жаргаж

Боржигон нэрийг үл егүүтгэн

Богдсын төрийг үл алдах болтугай.

Чин сүмбэр уул мэт цогтой болоод

Чандмань эрдэнэ гарт барьсан мэт жаргатугай.

Хатан эх нь ерөөл ерөөнөм

Нуур далай мэт сантай болтугай.

Нугасан галуун мэт үртэй болтугай.

Найман хөлт ширээндээ суун жаргаж

Нармай их улсаа эзлэх болтугай.

Наран саран мэт мандтугай.

Навч цэцэг мэт дэлгэртүгэй.

Бурхан мэт буянтай болтугай.

Будаа мэт олон малтай болтугай.

Уулнаас их цагаан гэртэй болтугай.

Одноос олон малтай болтугай.

Хун цэн мэт олон үртэй болтугай

Хулсан нарсан мэт олон улстай болтугай.

Хурааш хумиш үгүй

Их төрийн эзэн болон жаргатугай.

Начин шонхор мэт үртэй болтугай.

Наран тэнгэр мэт гэрэлтэй болтугай.

Төрсөн бие мөнх болтугай.

Төр эзлэх хөвгүүнтэй болтугай.

Амин насан урт болтугай.

Авсан даасан лугаа

Өнөд аху болтугай.

Ашид их жаргалангийн эзэн

Их ноён болон ийн жарган заяан атугай.