Хутагт бурхан багшийн зарлигаар
Хурмаст тэнгэрийн ерөөлөөр бүтсэн
Ерэн есөн тэнгэр
Ширмэн сайхан халхад
Ширдмэл сайхан гүн ширээт
Алтан их алхт
Мөнгөн их дөшит
Махагала дархан гүжир чамд мөргөмүй.
Хөх морины дээр өөд болон соёрх.
Хүрхрэхүй дуун чинь
Хөвчийн цаагуур болтугай.
Хэлхүй их ерөөл чинь
Өмнө дээр болтугай.
Хайрт их ерөөл чинь
Миний өмнө орштугай.
Хамгийг заяагч
Хар моринд өөд болон соёрх.
Хан хүчир чамд мөргөмүй
Итгэмүй залбирмуй би
Хүж түлж
Хүчээ өгнөм.
Арц түлж ачаа өгнөм.
Мэлзээт өдөр чинь
Мэдэж
Болзоот өдөр чинь
Болзолдож
Ийм нэрт
Тийм жилт
Муу хүн би
Хамгийг заяасан
Хан гүжир чамд
Мөргөн магтан суунам.
Алтан алхыг чинь
Чимэг барин дууднам.
Мөнгөн дөшийн чинь
Мөнх хутгийг гуйнам.
Алтан алхын чинь
Арвин буяныг гуйнам.
Арвай буудай чанаж
Арвин хишгийг гуйнам.
Алаг даагыг
Амнаас татуулагч
Алтан алхны
Ишээс бариулагч
Хөвгүүнтэй болтугай.
Ээ хурай
Хээр дааганы
Амнаас татуулагч
Хэн бүхүй хүний
Гараас бариулагч
Хөвгүүний сүр сүнсийг гуйнам.
Ээ хурай
Хөдөөд байх
Дөрвөн хошуу малын
Мал адгуусны хутаг
Сүр сүнсийг гуйнам. Ээ хурай.
Тайлбар
Монголчууд эртнээс бөөгийн мөргөлийг шүтсээр иржээ. Шарын шажин ихэд дэлгэрснээс хойш бөөгийн нөлөө улмаар доройтсон байна. Гэвч 1921 оны хувьсгалаас хойш саяхан болтол монголд цөөн төдий бөө нэр байсан юм. Бөөгийн дуудлага бол монголын эртний шүлэг найргийн байдлыг мэдэхэд сонирхолтой хэрэглэгдэхүүн болно. Энэ дуудлагын бас нэг сонирхолтой тал нь бөө нэр шарын шашны нөлөөнд орж байсныг энэ дуудлага бас үзүүлж байна. Энд бөөгийн Гүжир тэнгэр, шарын шажны сахиус Махагала буюу Гомбыг нэгтгэн нийлүүлсэн байна.